LES MANCHES

Acabante zarrar los güeyos pasóme daqué mui raru. Diba per un furacu negru y perllargu, paecía que nun diba finar enxamás, pel qu’una especie d’aire diba voltiándome y dándome tarrascazos escontra les paredes imaxinaries que tenía. De sópitu’l furacu echóme d’ellí, como si me vomitare y apaecí nun llugar que nun viera enxamás, pa min que yera mui lloñe porque nun me sonaba nin un res.

Aquel furacu zarróse delantre los mios güeyos. Yera too d’un color gris y taba enllenu de círculos y formes xeométriques coloraes, marielles, y de magar, yeren de tolos colores. Ellí taba yo, ablucáu, mirando pa tolos llaos pa ver si yera enterame de qué pasare. Llueu como nun pasaba nada, tiré p’alantre y entamé a andar. De xemes en cuando echaba una güeyada p’atrás pa ver si’l buracu tornare a abrise pa poder meteme nél y dir pa la mio casa.

Nuna d’estes les manches de colores con formes xeométriques entamaron a camudar en coses que podíen vese y tocase, asina una mancha rosa en forma rectángulu camudó nun elefante pergrande, unes manches allargaes verdes ficiéronse un monte pergrande, una manchina redonda mariella que taba mui alta camudó nun sol,...

Aquella magaya coses entamó a falar conmigo y baillar alredor de mio, que taba enroscáu como una sacavera por mor del mieu que me diera ver eses coses camudándose. Una d’eses manches que paecía ser un espantaxu miróme y díxome: «¿Qué te pasa mozu? ¿Tiénesnos mieu?». Entós yo cola voz temblorosa retruqué-y: «Non, namás qu’al tar solu y entamar tantu movimientu asustéme un pocoñín». Toos entamaron a rise de min al altu la lleva y siguieron baillando unos con otros magar que-yos glayare pa que me ficieren casu.

Siguieron y siguimos baillando fasta que-y entrugé otra vegada y d’esta miente al espantaxu: «¿Cómo pueo facer pa salir d’esti llugar y poder llegar a la mio casina?». Ensin pensalu un res retrucóme l’espantaxu riéndose: «Tienes qu’andar too p’alantre hasta que atopes l’arcu la vieya. Namás lu veas cuerri fasta lo cimero d’él, pero cuerri rápido porque l’arcu la vieya desapaez ensin que te decates». «Munches gracies», retruqué yo y despidiéndome de toles coses / manches que había elli, tire p’alantre andando a galmiaes pa ver si yera quien a atopar l’arcu la vieya. Toos glayaron en coru: «Yá, qu’atopes rápido l’arcu la vieya» mientres víenme desapaecer pel camín. Cuando yá nun podía más daqué reflexóme la cara, yera daqué perguapo, yera l’arcu la vieya.

Escomencipié a correr y correr a tolo que podía correr y enantes de que desapaeciera llegué a lo cimero l’arcu la vieya y glayé: «¡Por fin! ¡D’equí pa casa otra vegada!» Nesto abrí los güeyos y taba echáu na cama ensi saber si lo que soñare fuera verdá o namás un suañu. Otra vegada el gripe tornaba facer de les suyes...

Dende L’Habana al Fumeru

Y equí toi yo 

rodiáu d’ébanu

esperando tornar

a lo xeláu,

onde dos montañes,

filo d’oru

y dos gotones verdes

fainme tar como en cielu.

Y equí toi yo

naguando por tar

otra vuelta, a la to vera

por tonar dende L’Habana

al Fumeru.